ನಿನ್ನ ಪ್ರೀತಿಯ ಬೆಚ್ಚನೆಯ ಪರಿಮಳವಾದರೂ ಸೂಸಲಿ ನನ್ನ ಈ ಪ್ರೀತಿಯ ಅಂಗಡಿಯ ಕಡೆಗೇ...!!

Image source - Internet!

ಸುಮ್ಮನೆ ಒಂದಿಷ್ಟು ಕನಸು, ಪ್ರೀತಿಗಳ ರಾಶಿ ಹಾಕಿ,
ಅಂಗಡಿ ಹಾಕಿ ಕೂತಿರುವೆ ಒಂದಷ್ಟು ದಿನದಿಂದ..
ಇನ್ನಾದರೂ ದೂರ ತಳ್ಳಿ ನಿನ್ನ ನಾಜೂಕು, ಕೋಪವ,
ಕೊಳ್ಳಲು ಬರುವೆಯಾ ಒಂದಿನಿತಾದರೂ ಈ ನನ್ನ ಪ್ರೀತಿಯ..?

ಪ್ರೀತಿ ಕನಸಿನ ತರಹ ರಾತ್ರಿಯಿಂದ ಬೆಳಗಿನವರೆಗೆ,
ಬಂದು ಹೋಗುವ ಸಾದಾ ಸೀದಾ ಸರಕಲ್ಲ,
ವರ್ಷದ ವಿರಹದ ಬೇಗುದಿಯ ತವಕದ ರೋದನೆ,
ಕೇಳಲು, ಕೊಳ್ಳಲು ಬಾ ಇನ್ನಾದರೂ ಈ ಪ್ರೀತಿ ನಿವೇದನೆ..

ಹೋದ ಕಡೆಯೆಲ್ಲಾ ನಿನ್ನದೇ ಮುಖ, ನಗುವೆಲ್ಲಾ ಚೆಲ್ಲಿದೆ,
ಹೃದಯದ ಬಿಗಿತ, ಜಿಗಿತ ನನ್ನ ಹಿಡಿತ ಮೀರಿ ಎಲ್ಲೋ ನಿಂತಿದೆ.
ಈಗಲಾದರೂ ನನ್ನ ಅಂಗಡಿ ಮುಖಕ್ಕೆ ಮುಖ ಹಾಕಿ ಹೋಗು ಚೆಲುವೆ,
ನಿನ್ನ ಪ್ರೀತಿಯ ಬೆಚ್ಚನೆಯ ಪರಿಮಳವಾದರೂ ಸೂಸಲಿ ನನ್ನ ಈ ಪ್ರೀತಿಯ ಅಂಗಡಿಯ ಕಡೆಗೇ...!!